栢景臺

屋主年中大部分時間都喺外地，所以個家要配合一種國際化、短暫逗留嘅生活方式，返到嚟舒服，走得又灑脫。串連起成個設計嘅一條線，就係佢對旅遊嘅熱愛，尤其係巴黎。所以我哋將艾菲爾鐵塔當成貫穿成個室內設計嘅一個低調主題，而唔係生硬咁照搬個圖案。

呢度層高比好多香港單位略低，與其同佢硬碰，我哋索性揀矮身嘅燈具。啲燈打向牆面，反射出嚟好似舞台燈光咁，正正係夜晚令鐵塔發亮嗰種光。客廳一幅特色牆延續呢個概念：炭灰工業黑白灰色調、帶金屬同雲石質感深度嘅牆紙，再加上呼應鐵塔結構嘅斜向幾何線條。

鐵塔主題一路帶入主人房，床頭上方有一件同款裝飾；再延伸到套廁，牆身同櫃體都加入斜角同對角線。我哋將廚房同浴室都做成開放式，又將浴室鏡對住窗外景觀，令浴室睇落大一倍，主人房亦因而更顯寬敞。