柏景臺

單位原本個廳呈鑽石形，係嗰種食位又唔還位嘅斜角間隔。所以我哋第一個決定，就係將大部分嗰浸尷尬空間併入客廳，再將個廳打開向海。配一個高身電視櫃同一塊雲石平台定好比例，個廳即刻顯得開揚、企理，其餘就交畀景觀。家品、裝飾同選材上我哋用咗雲石、木紋同一抹藍調穿插，令現代簡約嘅氛圍暖而唔冷。

因為屋主成日要開會、對住screen，我哋喺梳化背牆後面做咗一個多功能吧檯：朝早擺部手提電腦做嘢，晏晝快快手食餐飯，夜晚就變飲嘢角。廚房就將原本嘅工人房同工人廁所打通，換返充足嘅檯面同郁動空間，出面再配一張紋理優雅嘅石檯做用餐區。成個客廳區域，我哋將櫃身線條都收成弧形，令啲木工睇落順眼舒服。

幾乎所有櫃都係由我哋長期合作嘅傢俬廠度身訂造，正正係咁，先可以將每件嘢度到啱間隔，而唔係將就現成尺寸。女兒房用一個沉實嘅灰色做主調，吊櫃同儲物櫃以銅色金屬同深木紋點綴，增添層次，床邊再加一張圓角懸浮梳妝檯，配易打理嘅人造石檯面，安全又方便。主人房就將衣櫃嘅木紋一直拉去成幅牆，令收納收埋喺一道連續嘅特色牆入面，成間房睇落完整統一。